تعرف على مبلغ زكاة الفطر هذا العام في فرنسا

بسم الله الرحمن الرحيم!

خواطر" لبناطر"! "...إيجيبها لبلاد و إبعدها عن لوتاد"! 

عاش سكان مخيمات العزة و الكرامة هذه الأيام، لحظات مشوبة بالخوف و الفرح و الحذر.

_ قال لك عن " الداخلة" أرتفدت....

_ قالتها" الجبهة"، ألا لعادوا ما يسمعوا....عاد ل" التنظيم"، أسبوع من ليام طالس لعياط....قالها فمهرجانات و قالها ف"الواتس آب" و قالتها لجنة" السحاب".

يحرق بيكم، ثيقوا فتنظيمكم أشوى.

_ تلفني قاع، أعلى حد من أهل ولاية" الداخلة"، لعاد أبقي منهم رداد أخبار.

_ أهلأ، أنتوما شحالكم يا أهل " أعوينة بلقرع"؟

_ أحنا، لاباس أعلينا...أسمعنا، عن السمارة أرفدها" الطيموم".

_ ما نلا، ما هي حق.

جاء" عارظ"، ألا حدنو رغن التراب.

_ أيوا " لعيون"، قالوا نقطع أعليها الظو.

_ الظو، إتركو، عندي عنو ينقطع معاه" الريزو" و أحنا كيفنا كنا نتكلموا معاهم ظرك.

_السماء" بيظا" و لا طالع" تاكوت" و ماهي ريح باردة و لا وحدة حامية خابطة من بلد....

غاز بلدناه....بوش موكورش و أثنين ذو هوما واقفين، عامرين، الحمد لله.

الدقيق موجود...المتشيرات و البيظ و تمبسكيت، أحكمنا إحتياطنا منهم.

يغير، جيابت لخبار، يخلعونا ألا الفجر، داعيينهم لمولانا....أنتي، ياك" بنطرتك"حافرة لسنكها أقبالا فالتراب؟

_ يا أمي، شي مانك أمعدلتيه بيدك، ما تكدي تتكلمي فيه....يغير، بعد البريغ، المعدلة منو أجديد، ما شاء الله.

_ أيوا شوفي، يا محروقة بيها، باش أتحسي بيها تتعقد فالسماء، حوسي أتربكتك و العندك من كاقط....الماء ما معاه لعب...و طيبي خبزك من ظرك بالظو....المرط، ماهو شي...الراجل فم؟

_ قاس" ناحيتو"، لا إشوف بيه.....ساقيتو" الجبهة" شي، شوف شنهو....العالم، ناقع فلمياه، و هو ألا القلتي لو، إقول لك..." و الشلوحة، من بيهم"...يحرق عشرة من موتايا، ألا شارب شي....

_ لا توكلي لحمو....عندي ذاك النوع....شوفي، ألا كانو بقي أوقيات للتريكة و لا أبدا...شي ثاني لا إخمك....المصموك، ألعندي أنا ألا نفتح معاه ذا الموضوع يحمى" باتريه"....و عندو ألا عبارة وحدة من نهار أخلط على و هو إكررها..." ما قط أردمتي الرجالة الزينة بيديك، أمال إعود عندك إحساس ثاني....راجل قايس جبهات القتال، زغرتي لو أعلى مشيو و أعلى مجيه و لا تصبني من ألباسو ماهي" أتريتو"....راهو مسكن خالفة أمتينة عن  ذا الشعب...."...فالبداية، كان إطلع لي" الديغري" و كنت ندايغ معاه...ظرك، فهمت عن ذيك هي حياتو و ذاك هو ماضيه و ذوك الرجالة لمعاه هوما أخوتو و هوما أصحابو و هوما أهلو....أنا و تركتو يبغينا بطريقتو الخاصة...نيتو زينة و أخليصتو، و الله، ألا إمكني، أنا منها بتكمكيمتها...و طلست أعليه أخلاقي و توف...مصموك...معدل و لحجاب و الرقية ما أزاو فيه شي...و عدت نطلب لو مولانا فصلاتي، إرجعو لتريكتو.

_ أيوا، ألا ذكرهم مع أمجيهم إنشاء اللا...ألا شوفت أنعايلهم برا مهيبة، لا أقلعت أنا هيبة.

_ أنتي مصموكك، يلبس أنعايل...حمدى مولانا....أنا مصموكي، ما يفصل" الرونجرس" مع كرعيه....أنهار العيد، بالسيف أقنعتو، ماشي إسلم على أمو، أقنعتو يلبس أنعايل.

حس الرعد، يكلع أمك.

أدفعي شور" بنطرتك".

_ أحنا ما عندنا أرعد، ما عندنا أسحاب.

ألا يعطينا منها ألينفع...ما إظر و إيجيبها لبلاد و إبعدها عن لوتاد....عنك، تلفني لي بلخبار.

_ تشاو، يا صاحبتي.

د : بيبات أبحمد.